تاريخ ريگستان جو ڀاڱو ٻيو

تاريخ ريگستان جو ڀاڱو ٻيو 22 بابن تي مشتمل آهي. باب پهريون ٿر جي طبعي ڀاڱن، پارڪر جي نالي ضلعي جي نالي، ٿر جي تعليم ۽ يونين ڪائونسلن وغيره تي مشتمل آهي. باب ٻئي ۾ ٿر جون ڀٽون، ڀٽن جا نالا، ڀٽ جا ڀاڱا، ڪارونجهر ٽڪري، ريلوي رستا، ٿر جي مسافري وغيره ڏنل آهن، باب ٽئين ۾ ٿر جا ننڍا ۽ وڏا وڻ، باب چوٿين ۾ ٿر جي ٻوٽن بابت، باب پنجين ۾ ٿر جي ميون ۽ ولين بابت، باب ڇهين ۾ گاهن جا مختلف قسم، باب ستين ۾ ٿر جي آباد ٿيڻ، اتي جي رهندڙ قومن جي آدمشماري، ٿر جي ٻولي وغيره، باب اٺين ۾ ٿر جي ڳوٺن، انهن جي نالن، وانڍين، گهرو سامان، گهرو مشغولين وغيره جو ذڪر ڪيل آهي. باب نائين ۾ پنچائتن، قومي اڳواڻن، رسمن رواجن، شاديءَ جي رسمن، اولاد کي پالڻ وغيره، باب ڏهين ۾ ٿر جي برسات بابت اڳڪٿين، برسات وارن سنوڻن، تراين ۽ تلائن وغيره، باب يارهين ۾ ٿر جي کوهن، زمين جي مٿاڇري ۽ اونهائي، پاڻيءَ جي قسمن ۽ پاڻيءَ جي ڀرڻ وغيره بابت، باب ٻارهين ۾ ٿر جي روينيو سرشتي، پوک ۽ پيدائش، هارپي جي طريقي، سنڀال ۽ اپت وغيره جو سڄو احوال، باب تيرهين ۾ ٿر جي مالوند ماڻهن، جانورن، وٿاڻن، مال جي سنڀار، سڃاڻپ، چوري، پيرين، بيمارين ۽ علاج وغيره، باب چوڏهين ۾ ٿر جي پکين، گهرو پکين، جهنگلي پکين، جيتن (سرندڙ/ اڏامندڙ) وغيره بابت، باب پندرهين ۾ ٿر جي کاڌ خوراڪ، ڏُٿ، پوشاڪ، زيور ۽ مهمان نوازي وغيره، باب سورهين ۾ ٿر جي ڪاروبار، هنر، معدنيات، ڪارخانن، آمدني ۽ قرضن وغيره جو ذڪر ڪيل آهي. باب سترهين ۾ ٿر جي ڪچهري، بيتن، ڪافين، سگهڙن، ڳجهارتن، نشن، مال جي نالن وغيره جو احوال آهي. باب ارڙهين ۾ ٿر جي ميلن، راندين ۽ شڪارن وغيره، باب اوڻيهين ۾ ٿر جي لوڪ ادب وغيره جو بيان، باب ويهين ۾ مقامن، مساڻن، ڀوپن، جهاڙن، ڦيڻن، ٽاڻن، بيمارين جي علاج وغيره ۽ باب ايڪيهين ۾ هندو مسلم اتحاد، راڄوڻي فيصلن، مسجدن، مندرن، ماپ ۽ تور جي اوزارن وغيره جو احوال شامل آهي. هن ڪتاب جو مهاڳ غلام محمد گرامي ۽ مقدمو محبوب علي چنا لکيو. هن ڪتاب جو پهريون ڇاپو 1956ع، ٻيو ڇاپو 1975ع ۾، ٽيون ڇاپو 1988ع ۾ ۽ چوٿون ڇاپو 2005ع ۾ سنڌي ادبي بورڊ ڄام شوري ڇاپي پڌرو ڪيو آهي.

ڪتاب - ڀاڱي جون ٻِيون داخلائون